Alþýðubandalag Vestmannaeyja boðaði á dögunum fulltrúa frá Slökkviliðinu, Björgunarfélaginu, Rauða Krossinum og fleiri félögum sem m.a. sinna líknar og velferðarmálum hér í Vestmannaeyjum á sinn fund, og var tilgangurinn sá að afhenda þessum félögum fjárstyrki.

Ragnar Óskarsson talsmaður þeirra Alþýðubandalagsfélaga sagði í ræðu sinni að forsaga málsins væri sú að þegar að Alþýðubandalagið hætti formlegri starfemi þá átti félagið í Vestmannaeyjum húseign sem ákveðið var þá að selja og láta andvirðið renna til hinna ýmsu félagasamtaka.

Það var svo ekki fyrr en nú nýlega sem húsið loks seldist, og í framhaldi af því bauð Alþýðubandalagið til kaffisamsætis þar sem forsvarsmenn hinna ýmsu félaga tóku við styrkjunum fyrir hönd sinna félaga.

Alls voru veittir styrkir til ellefu félagasamtaka á bilinu 300-500.000/kr. og fékk Slökkvilið Vestmannaeyja 300.000/kr styrk í sinn hlut sem nýttur verður til kaupa á björgunarbúnaði fyrir liðið.

Slökkvilið Vestmannaeyja vill koma á framfæri innilegu þakklæti til Alþýðubandalags Vestmannaeyja fyrir þessa rausnarlegu gjöf.

(Á myndinni eru fulltrúar styrkþega ásamt fulltrúum Alþýðubandalagsins)