| 112 dagurinn 2009 |
 |
 |
 |
| Miðvikudagur, 04. febrúar 2009 21:13 |
|
(Tekið af vef Brunamálastofnunnar) 112-dagurinn verður haldinn um allt land þann 11. febrúar næstkomandi eins og undanfarin ár. Samstarfsaðilar dagsins eru Neyðarlínan, Ríkislögreglustjórinn, Brunamálastofnun, slökkvilið, Slysavarnafélagið Landsbjörg, Rauði krossinn, Landhelgisgæslan, Barnaverndarstofa, Landlæknisembættið, Landssamband slökkviliðs- og sjúkraflutningamanna og Flugstoðir.
Að þessu sinni verður sjónum beint sérstaklega að börnum og
ungmennum, öryggi þeirra og velferð. Markmiðið er annars vegar að halda á lofti því víðtæka öryggis- og velferðarkerfi sem börn og ungmenni hafa aðgang að í gegnum neyðarnúmerið. Einnig er ætlunin að benda á leiðir fyrir börn og ungmenni til þess að taka þátt í starfi samtaka á þessu sviði og stuðla að eigin öryggi og annarra, meðal annars með þekkingu í skyndihjálp, slysavörnum og eldvörnum. Áhersla er lögð á að fjallað verði um daginn og efni hans í grunnskólum landsins. Neyðarlínan mun á næstunni senda öllum grunnskólum efni þar að lútandi og hvetja þá til þess að taka það með einhverjum hætti fyrir á 112-daginn. Lögð verður áhersla á að æfa rýmingaráætlun í skólum, hafa sýnikennslu í skyndihjálp, sýna börnunum áhugaverðan búnað, kynna réttindi barna eða einfaldlega gera vart við sig á skólalóðinni og ræða við börnin í tilefni dagsins. Meðfylgjandi er þess vegna dæmigerð lýsing á því hvernig rýmingaráætlun fyrir skóla er unnin sem unnin er í samvinnu við Slökkvilið höfuðborgarsvæðisins. Dagurinn verður að venju vettvangur fyrir afhendingu verðlauna í Eldvarnagetraun LSS og útnefningu skyndihjálparmanns Rauða krossins. Ennfremur gefur Fréttablaðið út sérblað í tilefni dagsins og verður því dreift í yfir 100 þúsund eintökum um allt land.
|
