Slökkviliðið var ræst út rúmlega hálf fimm í dag, en tilkynnt hafði verið um mikin vatnsleka í Barnaskólanum.

Þegar slökkviliðið kom á vettvang flæddi vatnið niður með loftræstitúðum í sameiginlegri aðstöðu kennara á annari hæð og áfram niður stigaganginn.

Í vinnuaðstöðu kennara var ökkladjúpt vatn yfir öllu gólfinu og einnig í loftræstirými á þriðju hæð þaðan sem vatnsflóðið átti upptök sín, en svo virðist sem hitaeliment í loftræstisamstæðunni hafi frostsprungið með þessum afleiðingum.

Vel gekk að hreinsa upp vatnið en meðal annars þurfti að hreinsa burtu einangrun á loftaplötu í köldu rými inn af loftræstirýminu þar sem mikið vatn hafði safnast undir og lak svo þaðan niður í vinnuaðstöðu kennara.

Voru starfsmenn skólans meðal annars ræstir út  og fóru í það verk ásamt slökkviliðsmönnum að forða tölvubúnaði, bókum og húsgögnum frá frekari skemmdum en ljóst er að töluvert tjón hefur orðið m.a. á húsgögnum og öðrum innanstokksmunum.(Myndin tengist fréttinni ekki beint)(Myndir frá útkallinu)